Rheoleiddio gwasanaethau VoIP

Crynodeb o’n hymgynghoriad

Cyflwyniad

Ni (Ofcom) yw rheoleiddiwr annibynnol gwasanaethau teledu, radio, telegyfathrebiadau a chyfathrebu diwifr yn y DG.

Mae’r ddogfen ymgynghori hon yn nodi ein dull arfaethedig o reoleiddio gwasanaethau llais o ganlyniad i ddatblygiadau technolegol newydd. Yn benodol, mae’n edrych ar y modd y dylwn reoleiddio gwahanol fathau o wasanaethau Protocol Llais dros y Rhyngrwyd (gwasanaethau VoIP) er mwyn sicrhau bod buddiannau cwsmeriaid yn cael eu hamddiffyn cyn belled ag y bo modd. Mae’r llyfryn hwn yn rhoi crynodeb i chi o sut rydym yn bwriadu rheoleiddio gwasanaethau VoIP. Gallwch weld y ddogfen ymgynghori lawn ar ein gwefan yn www.ofcom.org.uk.

Mae gwasanaethau ffôn traddodiadol wedi bodoli ers dros 100 mlynedd. Fodd bynnag, mae newidiadau’n digwydd a allai effeithio’n sylweddol ar y modd y caiff gwasanaethau eu darparu yn y dyfodol. Yn benodol, mae gwasanaethau llais sy’n defnyddio’r ‘Protocol Llais dros y Rhyngrwyd’ (VoIP) yn newid y modd y caiff gwasanaethau llais eu cyflwyno. Fel arfer mae’r gwasanaethau hyn yn defnyddio cyswllt band eang i ddarparu galwadau llais gan ddefnyddio technoleg VoIP drwy gyfrifiadur personol gyda set law neu glustffon, neu addaswr arbennig wedi’i gysylltu i set law ffôn traddodiadol. Gallai gwasanaethau VoIP fod o fudd mawr i gwsmeriaid drwy leihau cost cyflwyno gwasanaethau presennol, annog gwasanaethau newydd a chynyddu cystadleuaeth.

Pan fydd technolegau’n newid, byddwn yn disgwyl i gwsmeriaid elwa fwyaf fel arfer:

• pan ellir cyflwyno technoleg newydd yn gyflym;
• pan nad yw rheoliadau’n atal cynnig gwasanaethau newydd; a
• phan fydd cystadleuaeth deg rhwng technolegau a gwasanaethau hen a newydd.

Mae’n bwysig hefyd wrth i dechnoleg ddatblygu, ein bod yn adolygu mesurau i amddiffyn cwsmeriaid fel bod y mesurau’n parhau i fod yn gwbl effeithiol.

Mewn ymateb i ddatblygiadau cynnar mewn gwasanaethau VoIP a thrafodaethau â rhanddeiliaid (fel gweithredwyr a chwsmeriaid rhwydwaith), cyhoeddwyd dogfen ymgynghori gennym o’r enw ‘Gwasanaethau Llais Newydd: Ymgynghoriad ac arweiniad interim’ ar 6 Medi 2004 (‘ymgynghoriad 2004’). Mae’r ddogfen honno’n nodi ein cynigion i helpu sicrhau ein bod yn bodloni buddiannau cwsmeriaid. Roedd y cynigion yn adlewyrchu terfynau cyfarwyddebau perthnasol yr Undeb Ewropeaidd a’r ffaith bod gwasanaethau VoIP yn dal i fod yn gymharol newydd.

Er mis Medi 2004, bu nifer o ddatblygiadau pellach sy’n golygu bod angen i ni ailasesu ein cynigion blaenorol i wneud yn siwr ein bod yn cyflawni ein nodau ar gyfer gwasanaethau VoIP.

Mae’r ddogfen ymgynghori lawn yn nodi ein dull arfaethedig o reoleiddio gwasanaethau VoIP er mwyn annog parhau i ddatblygu gwasanaethau VoIP yn y dyfodol a gwneud yn siwr ein bod yn parhau i fodloni buddiannau cwsmeriaid.